Lačhi belveli thaj mišto aviljen ko ivento „E Roma, i Zor le Naturaki“! Ando anav le organizatorjengo thaj savorengo kaj organizisarde kado korkorutno kidipe, mangas te bišalas tumenge savorenge amare maj lačhe godisarimata – e reprezentanturja katar o Guverno le Serbiako, e internacionalo organizacie thaj e diplomatikane misie, i media, e kulturalo institucie, amare amala andar o domeno le bisnisosko, e aktivisturja, e političarja, amare akharde pakivale manuša thaj mire amala, phrala thaj phenja.
O anav le iventosko „E Roma, i Zor le Naturaki“ si les andre i signifikacia kadale momentoski.
Ame das pakiv pal i rezilienca, i zor thaj o khetanipe le romane komunitetako kontra o historikano pharipe. E roma nakhle andar but pharimata de kana našle andar i India thaj aresle andi Evropa. Dikhljam thagarimata, rajkanimata, manuša thaj thema kaj vazdine pes thaj kaj peravdile, ama ame ačhiljam ande pirende.
Avdives si 12 milionurja roma andi Evropa thaj maj but de 20 milionurja pi sasti phuv. Te dživisardesas savore Roma ande jekh korkoro them, kodo them sas te ovel maj baro de sar orsavo aver them ando regiono thaj sas te ovel o 12-to vaj o 13-to maj baro them andar i Evropaki Unia. Perdal amaro baro gin, daštisajljam te dživisaras bi te keras thema, granice thaj armie.
Amari čhib dživisardjas. But roma na den duma romanes, ama si inke milionurja roma kaj den duma amari čhib bi te ovel len ramosarde lila, škole, sikljarne, biblioteke, edukaciake thaj kulturake ministerurja. Aver ačhile dživde kerindos thema, granice thaj armie. Ame adaptisardjam amen thaj arakhljam harmonia kodolenca kaj si pašal amende. Sikliljam te dživas verver kulturenca, verver čhibjenca, verver religienca thaj dikhas maj dur.
Perdal amari rezilienca, ame inke dživas ande maj phare kondicie andar i Evropa. Amare manuša inke si dukhavde katar baro čororimos, katar i violenca, diskriminacia thaj rasismo. Vi kadja, but andar amende džas maj dur andi xoli savore butjengi. Si amen sar maj but sukcesoske manuša, but andar lende si kathe ande kadaja rjat, vi e liderja katar verver organizacie kaj kerde šajutno kado ivento.
Kado koncerto si jekh metafora, i reprezentacia kadale historikane zoraki kaj kerdjas amen te dživisaras thaj te džas maj dur andi xoli savore butjengi. E artisturja kaj si kathe ande kadaja rjat sikaven kadaja zor. Von aven andar verver thema, andar verver muzikalo stilurja thaj andar verver muzikalo tradicie, ama kana savore aven khetanes, o kaliteto našti thol pes telal o pučipe, vi kana e manuša mangen amen vaj na mangen amen.
Kadaja zor naturaki na vakerel toke pal amende sar nacia, ama vi sar džene. E liderja katar o Opre Roma Miškipe andar i Serbia, katar o Evropako Romano Instituto vaš Arte thaj Kultura, katar o Romano Edukaciako Fondo thaj savore organizacie kaj sas kotor andar kado ivento si eksemplurja dženenge kaj si len andre kadaja zor.
Ande kadi rjat mangav te dav duma pal jekh andar lende – o Mensur Haliti. O Mensur si jekh andar e maj bare thaj maj godjale liderja andar i Evropa. Vov si i godi kaj sas ande zenja kadale saste operaciaki kaj tume si te dikhen ande kadaja rjat. Lesko šajpe te barjarel thaj te xulavel peske džanimata si infinito thaj leski energia si biagoresko. Si andar mande bari pakiv, lošalipe thaj baxt te kerav buti lesa de 20 berša.
Bibahtasa, o Mensur na-i amenca kathe ande kadi rjat. Vov si ando Berlino thaj dikhel amen online, adžukerel peske familiasa, peske romnjasa i Zehra thaj peske čhavesa o Mensur, te biandjol lesko xurdo, o Emir. Hajden te najsaras leske, te das leske aplauze soske si te lošaljas khetanes ande kadi rjat! Palikeras tuke, Mensur, andar tute sam jekh zor naturaki!
